ریاست اجراییه می‌گوید که دمیتری میدویدیوف، نخست‌وزیر روسیه از عبدالله عبدالله، رئیس اجراییه افغانستان دعودت کرده که در نشست سران سازمان همکاری‌های شانگهای شرکت کند.
تاریخ انتشار :دوشنبه ۱۵ عقرب ۱۳۹۶ ساعت ۱۴:۱۶
کد مطلب : 75606
آقای عبدالله (یک‌شنبه، ۱۴ عقرب) با الکساندر مانتیتسکی، سفیر روسیه در کابل دیدار و آقای مانتیتسکی دعوت‌نامه نخست‌وزیر روسیه را به عبدالله عبدالله تقدیم کرده‌است.
در خبرنامهٔ ریاست اجراییه آمده‌است که آقای عبدالله ضمن قبول دعوت نخست‌وزیر روسیه برای شرکت در نشست سران حکومت‌های سازمان همکاری‌های شانگهای، در این دیدار بر گسترش همکاری‌ها میان کابل و مسکو در زمینه‌های مختلف و مبارزهٔ دو کشور با تروریسم و هراس‌افگنی تأکید کرد.
آقای عبدالله از روسیه خواسته که حکومت وحدت ملی را در زمینهٔ رسیدگی با حوادث همکاری نماید.
سفیر روسیه در این دیدار گفته که کشورش آمادهٔ همکاری در بخش‌های مختلف با دولت و مردم افغانستان می‌باشد.
او همچنان آمادگی کشورش را برای همکاری با افغانستان در بخش رسیدگی به حوادث اعلام کرده‌است.
سازمان همکاری‌های شانگهای در سال ۲۰۰۱ توسط رهبران چین، روسیه، قزاقستان، قرغزستان، تاجکستان و ازبکستان به هدف گسترش همکاری‌ها در عرصه‌های امنیتی، اقتصادی و همکاری‌های منطقه‌ای ایجاد شد.
افغانستان عضویت ناظر را در سال ۱۳۹۱ در دوازدهمین اجلاس سران این سازمان در شهر بیجینگ پایتخت چین، دریافت کرد.
سال گذشته رئیس‌جمهور غنی به نمایندگی از افغانستان در شانزدهمین اجلاس سران کشورهای عضو و ناظر سازمان همکاری‌های شانگهای در تاشکند پایتخت ازبکستان شرکت کرده بود.
منبع : اطلاعات روز
payam-aftab.com/vdcd9905.yt0kz6a22y.html