تاریخ انتشار :سه شنبه ۸ قوس ۱۴۰۱ ساعت ۰۹:۴۶
کد مطلب : 101556
ابراز نگرانی تاجیکستان از نفوذ تروریسم از افغانستان به آسیای میانه
معاون وزارت امور خارجه تاجیکستان، صبح امروز 8 قوس/آذر، در نشست امنیتی هرات گفت که فعالیت‌های تروریستی در خاک افغانستان افزایش یافته است.
به گزارش پیام آفتاب، نشست امنیتی هرات با محوریت «نظام سیاسی فراگیر؛ الگوها و نقشه‌ راه» در شهر دوشنبه  تاجیکستان در حال برگزاری است. در این نشست معاون وزارت امور خارجه تاجیکستان گفته است که فعالیت‌های تروریستی در خاک افغانستان افزایش یافته است.
 
فرهاد سلیم، معاون وزیر خارجه تاجیکستان، امروز سه‌شنبه، ۸ قوس/آذر، در سخنرانی‌اش در نشست امنیتی هرات در شهر دوشنبه، پایتخت تاجیکستان، از افزایش فعالیت‌های تروریستی در افغانستان ابراز نگرانی کرده است.
 
او گفته است: «ما نگران افزایش فعالیت سازمان‌های تروریستی در افغانستان هستیم.»
 
معاون وزیر خارجه تاجیکستان همچنان خاطرنشان کرده است که کشورش نقض حقوق زنان و ملیت‌های ساکن در افغانستان را محکوم می‌کند.
 
این مقام دولتی تاجیکستان بر تشکیل نظام سیاسی فراگیر در افغانستان برای پایان دادن به منازعه دوام‌دار در این کشور تأکید کرده است.
 
رنگین دادفر اسپنتا وزیر خارجه پیشین افغانستان نیز در این نشست گفت: ما در فرایند ایجاد دولت ملی دچار اشکالات ساختاری بوده ایم. و این اشکال‌ها از روابط واقعی قدرت سیاسی در درون جامعه، بافت اجتماعی و ایدیولوژی‌های دولت‌سازی برخاسته اند.
آقای اسپنتا افزود: برخی از نخبگان سنتی و نخبگان برگشته از غرب بجای تدوین یک باور فراگیر دموکراتیک افغانستان شمول از یک سو بیشتر در همراهی با برخی از حامیان غربی به فساد، نژاد و قوم‌گرایی روی آوردند و از جانب دیگر دموکراسی و انتخابات را به مضحکه‌های پر از تقلب مسخ کردند.
 
دهمین نشست امنیتی هرات با اشتراک حدود ۲۰۰ نماینده از اروپا، آسیا و امریکا برای اولین بار در خارج از افغانستان در حال برگزاری است.
 
 
 
 
https://payam-aftab.com/vdcftydyvw6dxta.igiw.html
ارسال نظر
نام شما
آدرس ايميل شما

0