حامدکرزی د دري ستراتیژیکو سندونو د لاسليک لپاره اروپا ته ځي

دافغانستان حکومت وایي، چې په راتلونکې اونۍ کې به ولسمشر کرزی له یو شمېر هېوادونو سره د ستراتیژیکو اړیکو د ټینګولو په هدف اروپا ته سفر وکړي.
د بهرنیو چارو وزارت ویاند جانان موسی زي پرون په کابل کې خبریالانو ته وویل، چې ولسمشرکرزی به له ايټالیا سره د ستراتيژیکو همکارېو موافقه، له فرانسې سره معاهده او له بریتانیې سره د ستراتیژیکو همکاریو تړون لاسلیک کړي چې مودې یي توپیر لري.
د هغه په وینا ولسمشر کرز ی به د جمعي په ورځ پاریس ته ولاړ شي .
د موسی زي په خبره د دې ستراتیژیکو همکاریو په ترڅ کې به دا هېوادونه د اوږدې مودې لپاره له افغانستان سره په سیاسي، اقتصادي، پوځي او داسې نورو برخو کې خپلو مرستو ته دوام ورکوي.
ده څرګنده کړه، چې له امریکا سره د ستراتیژیک سند په اړه به ډیر ژر د دواړو خواوو ترمنځ خبرې اترې بیا پیل شي.