​رئیس اجراییه با رئیس‌جمهور تاجیکستان دیدار کرد / رحمان: امنیت افغانستان امنیت تاجیکستان است

تاریخ انتشار : پنجشنبه ۱۹ میزان ۱۳۹۷ ساعت ۱۶:۳۶
​رئیس اجراییه با رئیس‌جمهور تاجیکستان دیدار کرد / رحمان: امنیت افغانستان امنیت تاجیکستان است
«عبدالله عبدالله» رئیس اجراییه امروز (پنجشنبه ۱۹ میزان ۱۳۹۷) در حاشیهٔ اجلاس سران حکومت‌های عضو سازمان همکاری شانگهای در قصر ملت با «امام علی رحمان» رئیس‌جمهور تاجیکستان دیدار کرد.
رئیس‌جمهور تاجیکستان ضمن خوش آمدگویی به داکتر عبدالله گفت که کشورش به روابط با افغانستان به عنوان دوست و همسایه اهمیت فراوان قایل است.
امام علی رحمان در ادامه افزود که کشورش وضعیت در افغانستان را دنبال می‌کند و امنیت و آرامی در تاجیکستان و منطقه را در گرو امنیت و آرامی در افغانستان می‌داند.
رئیس اجراییه با قدردانی از استقبال گرم امام علی رحمان، تاجیکستان را از دوستان و متحدان استراتیژیک و نزدیک افغانستان خواند و از میزبانی نشست سران حکومت‌های شانگهای توسط تاجیکستان قدردانی کرد.
عبدالله عبدالله گفت که تروریسم تهدیدی مشترک برای افغانستان و تاجکستان بوده و نیاز است تا در برابر این پدیده مبارزه مشترک صورت گیرد.
در این نشست دو طرف دربارهٔ امنیت، مبارزه مشترک با دهشت‌افگنی، قاچاق موادمخدر، همکاری و همگرایی منطقه‌ای، روابط منطقه‌ای افغانستان، افزایش دادوستد بازرگانی و جلب همکاری کشورهای منطقه برای تأمین صلح به رهبری و مالکیت مردم افغانستان به بحث و تبادل نظر پرداختند.
رئیس اجراییه پس از ملاقات با امام علی رحمان در نشستی خبری با رسانه‌های این کشور صحبت کرد.
عبدالله گفت که افغانستان و تاجیکستان دوست و متحد استراتیژیک هستند و با صداقت با یکدیگر در عرصه‌های مختلف همکاری می‌نمایند.
رئیس اجراییه صحبت‌های خود با رئیس‌جمهور تاجیکستان را سازنده و همه شمول خواند و از استقبال و توجه رئیس‌جمهور تاجیکستان به قضایای افغانستان سپاس‌گزاری و تشکر کرد.
عبدالله گفت که در این ملاقات روی مبارزه مشترک دو کشور برای از بین بردن پدیده تروریسم تأکید گردید.
رئیس اجرائیه همچنان گفت که تاجیکستان حامی صلح در افغانستان می‌باشد.
کد مطلب: 84871
لينک کوتاه خبر: https://goo.gl/BFqpAj
 


 
نام و نام خانوادگی
ایمیل