موافقتنامه ترانزیتی «پتا» میان افغانستان، پاکستان و تاجیکستان امضا می‌شود/ الکوزی: «پتا» تنها به نفع پاکستان است

پیام آفتاب: مقامات اقتصادی افغانستان، پاکستان و تاجیکستان اعلام کردند که موافقتنامه ترانزیتی «پتا» آماده است و به زودی امضاء خواهد شد. این در حالی است که معاون اتاق تجارت و صنایع تأکید دارد از این موافقتنامه تنها پاکستان سود می‌برد.
تاریخ انتشار : شنبه ۲۲ حمل ۱۳۹۴ ساعت ۱۲:۲۱
موافقتنامه ترانزیتی «پتا» میان افغانستان، پاکستان و تاجیکستان امضا می‌شود/ الکوزی: «پتا» تنها به نفع پاکستان است
مقامات اقتصادی افغانستان، پاکستان و تاجیکستان اعلام کردند که موافقتنامهٔ ترانزیتی «پتا» آماده است و به زودی امضاء خواهد شد.

به گزارش پیام آفتاب و به نقل از تلویزیون یک، معاون وزیر اقتصاد و تجارت تاجیکستان، در نشست سران افغانستان، پاکستان و تاجیکستان در «دوشنبه» گفت که با عملی شدن مفاد این توافقنامه، میزان مبادلات بازرگانی میان این سه کشور به پنج میلیارد دالر افزایش خواهد یافت.

«سید رحمان نظروف»، معاون وزارت اقتصاد و تجارت تاجیکستان گفت: «درباره مواد این توافقنامه در پایان نشست سه جانبه‌ای که مقامات هر سه کشور شرکت دارند، تصمیم گرفته خواهد شد.»

بر اساس این موافقتنامه، کالاهای تجاری پاکستان از مسیر افغانستان به آسیای میانه منتقل می‌شود.

انتظار می‌رود که گفتگوها در این مورد تا دوشنبه همین هفته نهایی شود.

با این حال معاون اتاق تجارت و صنایع تأکید دارد که از این سند تنها پاکستان سود می‌برد.

«خانجان الکوزی»، معاون اتاق تجارت و صنایع گفت که افغانستان نباید این موافقت‌نامه را نهایی می‌کرد چون در این سند تنها منافع پاکستان در نظر گرفته شده است.

وی تأکید کرد که مشکلات بندرهای واگه و کراچی هنوز حل نشده است.

در همین حال تاجرانی که کالاهای تجاری خود را از طریق بندر واگه و کراچی انتقال می‌دهند می‌گویند که هنوز پاکستان در بنادر خود مشکلات ترانزیتی افغانستان را حل نکرده است.

پیش از این پاکستان تلاش داشت تاجیکستان در قرارداد تجارتی و ترانزیتی «اپتا» شریک شود، اما افغانستان شرط گذاشته بود که افزون بر تاجیکستان، هند نیز می‌بایست شامل این قرارداد شود.

به گفته کارشناسان، دولت افغانستان با شریک‌شدن هند در این قرارداد می‌توانست بدون مشکل با هند مبادلات بازرگانی داشته باشد، اما اکنون بدون اینکه مشکلات تاجران افغان در بندر کراچی و واگه حل شود، توافقنامه سه جانبه افغانستان، پاکستان و تاجیکستان نهایی شده است.
کد مطلب: 32442
 


 
نام و نام خانوادگی
ایمیل